Merca a impone sancion economico nobo riba gobierno di Nicolas Maduro, hungando un di su ultimo cartanan pa forsa salida di e presidente de facto, cu e no ta reconoce. E medida por afecta e ciudadanonan mas vulnerable y, de paso, Colombia tambe.
For di 5 di augustus Merca a aumenta e sancionnan contra e regimen. Loke a cuminsa cu castigo individual y sector petrolero, di oro y e propio Banco Central di Venezuela, a bira awor un embargo di bienes di e republica den teritorio Mericano y un advertencia pa tur esunnan, sin importa pais o nacionalidad, cu ta colabora cu e Chavistanan. E no ta un blokeo total, pero si ta prohibi haci negoshi cu gobierno.
Sin embargo, esaki ta haci cu un banco Mericano, cada biaha cu nan mira un transaccion di un empresa Venezolano, ta puntra nan mes si esaki por ta un operacion camufla di e regimen Chavista.
“E percepcion di riesgo di haci transaccion cu Venezuela ta aumenta, y pa e dificultad di e sistema financiero internacional di discrimina si un operacion por beneficia e regimen of no, husto ta paga pa pecador,” e economista Asdrubal Oliveros ta conta.
E gremio di comerciante a trata di keda calmo, pasobra e sancionnan no tin alcance den actividad priva. Asina mes ta preocupa nan cu esaki ta complica na acceso na otro mercado o ta afecta e posibilidad di haya prestamo, den un pais cu crisis di credito bancario.
Di igual manera, na Colombia tambe e gremio empresarial a expresa incertidumbre pa loke ta nan relacion comercial cu e pais bisiña. Segun IMF importacion lo a cay cu 35% e aña aki, pero esey tabata prome cu anuncio di e blokeo Mericano.
