Ayera diabierna, pa prome biaha, miyones di Venezolano a ricibi dos dollar pa concepto di pago di sueldo y pension. E hecho aki ta e confirmacion di un crisis sin precedente cu a baha e salario minimo pa luna te na dos dollar y cu tin e ciudadanonan den su mayoria bibando na miseria y sin un pronto solucion na caminda.
Cu e dollar Americano alrededor di 20.000 bolivar, e salario minimo ta yega na 40.000 bolivar pa luna, un cantidad cu no ta alcansa pa cumpra un kilo di carni of un caha di webo.
Entre personanan hubila y empleadonan activo ta casi 10 miyon di persona cu e siman aki a ricibi den nan cuenta di banco e cifra ekivalente pa un dollar, segun e prijs oficial di e Banco Central (BCV) pa motibo cu na mercado paralelo, cu ta guia tur actividad economico, e moneda local ta ainda mas desbalorisa.
Cu optimismo y algo di suerte, cualkier Venezolano cu ta gana e cifra aki pa luna lo por cumpra un hariña di maishi of un kilo di sucu. Un bes cu e productonan aki ta caba, den dos of tres dia, lo tin cu warda te otro dia di cobra salario, ora lo bay tin un cantidad menos siguramente.
Den ultimo 30 dia, e moneda local bolivar a devalua su 50% compara cu e dollar, cu ayera tabata costa e dobel cu na final di luna di juli, tur dentro di hiper inflacion nacional den cual e prijsnan di servicio y productonan ta subi dia pa dia.
