Un oficina situa na Ciudad de Panama a encarga su mes cu maneha 70% di e petroleo cu Venezuela a exporta na augustus. Ta trata di e sede di Rosneft Oil Co PJSC, den cual ta traha dos ekipo di specialista contrata pa Pdvsa, di acuerdo cu fuentenan di Bloomberg.
E papel di e empresa petrolero estatal Ruso Rosneft den maneho di petroleo Venezolano a haya importancia desde cu e sancionnan di gobierno Mericano a bira mas fuerte. Esaki ta parcialmente tambe consecuencia di e retiro di China, cu tin dos luna sin ricibi crudo directamente di Venezuela.
Desde 2014 Rosneft a asocia cu Pdvsa y a presta Pdvsa US$ 6,5 biyon a cambio di petroleo. Di e debe ey, a paga e mayor parti caba, segun Bloomberg, y ta keda un suma restante di US$ 1,1 biyon.
E agencia a afirma cu e clientenan ta keha cu awor e mayoria di e negociantenan di crudo di e empresa estatal Pdvsa no ta papia Ingles y “tin problema cu concepto simple manera arbitrahe y tarifa di flete.” Tambe nan ta keha cu mayoria di yamada telefonico o mail ta keda sin respuesta.
E compania Ruso ta defende su posicion bisando cu mayoria di e acuerdonan cu Pdvsa tabata firma prome cu e sancionnan. Incluso nan ta bisa cu ta trata di un competencia desleal contra nan, ya cu gobierno Mericano ta permiti e companianan Mericano haci negoshi cu e empresa Venezolano, bao di algun excepcion, manera e caso di Chevron, Halliburton y Schlumberger.
