(ElNacional/EFE) – Alrededor di 300 muhe a protesta diaranson na Caracas, en conexion cu e Dia Internacional di Hende Muhe, pa exigi e cumplimento di nan derechonan laboral. Nan a reclama tambe pa e mehoracion den e normanan cu ta contempla asuntonan manera violencia di genero of salud sexual y reproductivo, entre otro.
“Mi t’ey e dia di awe conmemorando e Dia Internacional di Hende Muhe, exigiendo pa e muhenan tin e mesun derechonan cu tur persona, cu ta reconoce e trabou digno, e trabounan di cuido. Y cu nos tin condicionnan digno di bida pa sigui eherce loke nos ta haci diariamente. Y pa por haya finalmente e equidad y igualdad di genero,” e activista Vanesa Blanco a bisa EFE.
Cu e slogan ‘Tenemos Derechos’ (Nos tin Derecho), e muhenan, convoca pa organisacionnan sindical, a marcha cu e intencion di yega na e sede di e vice presidencia, den e centro di Caracas, esaki pa entrega un documento cu nan exigencianan. Pero finalmente nan a entrega esaki na funcionarionan policial, ora cu nan impedi nan paso te na e punto ey.
Blanco a señala cu aunke tin avancenan na e pais cu a tuma luga pa loke ta trata igualdad di genero, ta existi loke el a yama “retrasonan” ainda. El a referi specialmente na e equidad di salario entre hende muhe y hende homber.
Mariela Ramirez, integrante di e Foro Civico cu ta agrupa 690 organisacion y 194 actor di e sociedad civil, a declara na EFE cu Venezuela ta sumamente atrasa den e materia di derechonan laboral. Entre nan el a menciona e salarionan abao, como tambe e cuido durante embaraso y lactancia.
