E reservanan di oro na Banco Central di Venezuela (BCV), maneha pa e regimen Chavista, a keda reduci na menos di 100 tonelada na fin di juni, e volumen mas abao den 50 aña, segun datonan difundi pa e entidad mes.
Den promer semester di aña, siete tonelada di oro di maximo pureza a sali di e reserva di Banco Central, y e cantidad disponible awor ta 98 tonelada, di acuerdo cu e documentonan cu ta duna cuenta di e estado financiero di e organismo.
E valor di e reserva den oro na juni tabata na 4.993 miyon dollar, 200 miyon dollar mas cu na december 2019, unda e tabata na 4.789 miyon dollar. Sin embargo, e aumento ey tabata debi na e prijs internacional di e metal.
Pa mas di 50 aña Banco Central tabatin alrededor di 350 tonelada di oro te cu entre 2015 y 2017 a tramita prestamonan usando e baranan di oro como garantia. Algun bara a logra recupera y otronan a bay perdi den operacion di cambio.
Despues e reservanan a keda baha, manera varios fuente a informa, pa bende esakinan den exterior pa e pais por a haya divisa liquido a cambio. Esaki specialmente ora cu e caida di produccion di petroleo a cuminza coincidi cu e sancionnan Mericano.
Asina na april ultimo a reporta un salida di bara di oro y segun fuentenan consulta parti di e divisanan obteni tabata pa cumpra material quimico pa por procesa gasolin, debi na e problemanan den suministro di gasolin.
Na 2018 regimen di Nicolas Maduro a confirma cu a cuminza exporta oro pa Turquia. A pesar di e presion di Washington pa adverti e cumpradornan internacional di oro, gobierno Chavista a logra bende bastante via e regimen amigo di Erdogan.
