Regimen di Nicolas Maduro a rechasa e decision di presidente Mericano Donald Trump pa congela tur activo cu gobierno Venezolano y su entidadnan lo por tin na Merca. Canciyer Jorge Arreaza di Venezuela a califica e hecho como un “agresion a traves di accion arbitrario di terorismo economico contra pueblo di Venezuela.”
Den un comunicado, canciyeria Venezolano a sigura cu e medida di Trump ta “e sakeo mas grotesco y descara.” “No conforme cu e robo ilegal di e empresa Citgo y e sedenan diplomatico Venezolano, Cas Blanco y nan aliadonan ta busca oportunidad y recurso nobo pa usurpa y sakea loke ta pertenece na mas di 30 miyon Venezolano,” e texto ta señala.
Ministerio di Relacion Exterior di Nicolas Maduro a sigura cu Gobierno di Merca ta anticipa e fracaso di e negociacion entre delegado di e regimen y oposicion.
Vice-presidente Delcy Rodriguez a declara na emisora Union Radio cu “Merca a podera di nos propiedadnan sin lansa un bom.” El a rechasa e blokeo economico imponi pa gobierno di Trump y a bisa tambe cu e accion aki ta “un scop” pa e negociacion cu ta tumando luga na Barbados actualmente.
Rodriguez, ademas a insisti cu e decision di presidente Trump ta ilegitimo y ta viola derecho humano di e Venezolanonan. “E orden ehecutivo aki no ta pa Nicolas Maduro so; e ta ataca henter poblacion di Venezuela, e ta un blokeo economico total pa e pais,” el a añadi.
