(LaPatilla) – Fiscal general Chavista Tarek William Saab, a confirma ayera diamars cu a aresta e director di e ONG FundaRedes, Javier Tarazona, pa a denuncia vinculo di e regimen cu grupo iregular arma.
“Dia 2 di juli pasa a ser deteni Javier Tarazona, hunto cu Omar de Dios Garcia y Jose Rafael Tarazona, pa haci acusacion publico sin ningun fundamento cu ta incita odio y ta compromete gravemente paz na e Republica,”Saab a declara den rueda di prensa.
Segun su consideracion, hende mester ta responsable pa loke nan ta bisa. “Si ta papia un ofensa pa realiza declaracionnan publico, anto Javier Tarazona a denuncia sin presenta ningun evidencia, salvo un potret sin fecha,” el a agrega.
El a recorda tambe cu Tarazona a señala supuesto relacion comercial di estado Venezolanocu e gruponan delictivo, relaciona cu explotacion di oro, diamante y coltan. Y tambe di ta mantene pista y laboratorio clandestino pa elabora producto estupefaciente.
“Afirmando, ademas, cu ELN tin presencia den 21 entidad di e pais, sin presenta ningun documento cu ta proba su afirmacionnan. Sigur e señor ta un adicto di ‘narcoserie’ y ‘narconovela’ Colombiano”, Saab a conclui.
El a sigura cu e declaracionnan publico ye supuesto denuncia ta conforma “accion di incitacion di odio” contra e maximo autoridadnan di e pais y ta pretende crea un matriz di opinion negativo na nivel internacional.
Embahada di Canada na Venezuela a expresa preocupacion pa detencion arbitrario di e personanan, cu a acudi na Ministerio Publico pa haci denuncia di acoso y persecucion na man di funcionario publico, pero a keda aresta. Varios entidad di derecho humano na nivel internacional a expresa preocupacion pa e aresto di e activistanan di derecho humano.
