Ayera representantenan di regimen di Nicolas Maduro y e ‘mini partidonan’ di oposicion a realisa instalacion di e Mesa Nacional di Dialogo, den un hotel na Caracas den cual a discuti eleccion parlamentario pa otro aña.
“Na e mesa electoral aki a elabora riba e programa di trabao pa conformacion di un Conseho Nacional Electoral (CNE) nobo pa e proximo eleccion parlamentario di 2020,” e representante di e regimen, Francisco Ameliach, a bisa, ken ademas a indica cu “lo debati e conformacion di un sistema di representacion proporcional, como tambe e garantianan pa observacion internacional den eleccion.”
El a aclara cu “Constitucion Nacional no tin eleccion presidencial programa pa 2020. Eleccion cu nos ta evaluando ta esun di Parlamento Nacional.”
Timoteo Zambrano, diputado di Asamblea Nacional (AN) y miembro di e asina yama ‘minipartidonan’, den un entrevista cu e periodista Vladimir Villegas, a papia di e “e avancenan” di e Mesa di Dialogo Nacional, hunto cu regimen di Nicolas Maduro.
Zambrano a confirma cu “ta necesario y imprescindible cu nos tin propuesta concreto pa Asamblea Nacional pa conformacion di CNE. Nos lo ta dispuesto pa conversa cu ‘G4’ ( e partidonan considera mas importante: Primero Justicia (PJ), Un Nuevo Tiempo (UNT, Voluntad Popular (VP) , y Accion Democratica (AD; red.). Asamblea Nacional tin e responsabilidad di cumpli cu loke CNE ta bisa pa loke ta cualkier eleccion.”
Segun Zambrano, “e ‘mesita’ tabata un teremoto politico. No tin duda cu nos ta implementando loke por bira un CNE nobo. Den Asamblea tin diputado cu kier un cambio,” el a afirma.
