(LaPatilla) – Trahadonan cu ta cay bao di sectornan di educacion, salud y Corpoelec ta denuncia cu nan ta victima di un politica di atake gubernamental cu ta implica laga nan sin beneficio y cobrando un salario cu no ta cubri nan necesidadnan basico.
Sindicatonan di e tres sectornan ta splica cu gobierno a nenga ariba diferente ocasion pa discuti e contractnan colectivo, door di cual, nan a laga nan sin beneficionan manera HCM y ademas a reduci e primanan y escalanan ariba e tabla salarial.
“Nan ta hortando tur e beneficionan for di e trahadonan”, Alberto Perozo, secretario di reclamo di e sindicato di Corpoelec, a bisa ken a sigura cu nan no ta conta cu un salario acorde cu nan necesidadnan, ademas nan no tin seguro di salud pa cubri cualkier emergencia.
Perozo a agrega cu e gobierno nacional ta violando un derecho constitucional caminda ta estableci cu e salario minimo mester ta acorde cu e canasta di alimento pa nan por cubri nan necesidadnan. El a aclaria cu locual nan a haci cu e reciente aumento salarial tabata djis un spiel pasobra e no ta faborece e clase trahado, contrario, e primanan a wordo reduci y nan a hancra e bonus na e salario.
Luis Arroyo, presidente di Colegio di Profesornan a bisa cu e gobierno desde 2016 ta empeña den destrui tur e beneficionan social y economico di e trahado y p’esey hopi di nan ta bandona nan trabou. “Ni sikiera nan ta renuncia, nan ta djis bay, pasobra nan sa cu nan no ta bay haya un areglo digno”, el a bisa.
