Husticia di e regimen di Nicolas Maduro a ordena detencion di e seis agentenan di e cuerpo Fuerzas de Acciones Especiales (FAES), acusa di asesinato di dos periodista, segun informacion di fuentenan oficial dialuna pasa.
“Nos ta respalda e medida di orden di aresto emiti contra e funcionarionan Jose Salas, Nestor Olano, Nerio Alvarez, Andres Diaz, Jose Moreno y Jose Contreras,“ ministro di Interior Nestor Reverol a bisa den un comunicado.
E orden tabata emiti pa e Tribunal Penal den Promer Instancia di estado Zulia, cerca di frontera cu Colombia, unda a asesina e periodistanan Andres Eloy Nieves Zacarias y Victor Torres, di e medio Guacamaya TV.
E dos periodistanan a ser mata durante un operativo di FAES, un cuerpo di cual Alto Comisionado di Derecho Humano di Nacionnan Uni, Michelle Bachelet, a pidi su disolucion, a base di e multiple denuncianan di a comete miles di ehecucion extrahudicial.
E crimen a ser denuncia diadomingo pasa pa Sindicato Nacional di Trahadornan di Prensa (SNTP), cu a sigura cu esaki “a tuma lugar durante un operativo di FAES“.
E director di e canal, Franklin Torres, tata di un di e personanan asesina, a denuncia cu e agentenan di FAES a forza drenta e stacion di television unda e dos periodistanan tabata traha.
Torres a denuncia tambe cu a manipula e scenario poniendo arma riba e cadavernan y cu a confisca tur e equipo di e canal.
Sociedad Interamericano di Prensa (SIP) dialuna a condena e asesinato di e dos periodistanan y a urgi regimen di Nicolas Maduro pa esclarece e incidente di manera urgente.
