E reformador di e refineria Venezolano Cardon, crucial pa suministro di gasolin na e pais, ta paralisa atrobe pa un fayo y e falta di nitrogeno, segun un lider sindical y dos otro persona cu conocimento di e operacion, mientras escasez di gasolin ta persisti na e pais.
E empresa estatal Pdvsa a reanuda produccion di gasolin na e reformador di nafta un siman pasa, un medida cu ta duna un alivio na e suministro di gasolin, ya cu gran parti di e red di refinacion, di en total 1,3 miyon bari pa dia (bpd), ta paralisa despues di varios aña di desinversion y falta di mantenimento.
Banda di esey e sancionnan Mericano ta obstaculisa importacion di combustible. Segun un empleado cu a desea di mantene anonimato, un compresor a rementa y ademas no tin nitrogeno pa e planta, pasobra segun e lider sindical Ivan Freites e compania no por paga e proveedor di nitrogeno y no ta hayando nada. Reuters no por a haya comentario di parti di Pdvsa.
E reformador, cu capacidad di 45.000 bpd, ta un unidad di procesamento di nafta cu ta produci componente di octanahe halto usa den mezcla di gasolin. Pero Pdvsa a pone e unidad den operacion pa produci 25.000 bpd di gasolin pa manda directamente pa mercado interno.
Freites a conta Reuters cu e Fluidized Catalytic Cracker (FCC) cu capacidad di 88.000 bpd di Cardon, ta para tambe pero por bolbe den operacion den e proximo dianan, segun Freites.
Na e refineria El Palito cu capacidad di 146.000 bpd, e unidad di ‘catalytic cracking’ ta paralisa tambe.
Venezuela, den recesion economico, ta consumi alrededor di 180.000 bpd di gasolin den e pandemia y cu e deterioro di e refinerianan e suministro a keda reduci te na 30.000 bpd, causando enormes fila y protesta.
