E refineria Amuay, esun mas grandi di Venezuela, a reanuda operacion siman pasa, aunke algun unidad ta keda paralisa, segun declaracion di e lider sindical Ivan Freites y un trahado di e planta.
E instalacion cu capacidad pa procesa 645.000 bari di petroleo pa dia (bpd) a wordo totalmente paralisa na mita di januari pasa, cu e unidadnan di destilacion y e catalytic cracker fuera di operacion. “Amuay ya ta produciendo 230.000 bpd”, Ivan Freites a bisa, cu ta representante sindical di e trahadonan cerca e empresa estatal Pdvsa. El a afirma cu den e ultimo cuatro dianan e destiladonan 1, 2 y 5 di Amuay a wordo reactiva, como tambe e catalytic cracker.
E compania Pdvsa cu ta maneha e instalacion, no a responde di inmediato na un solicitud di informacion di Reuters.
Otro trahado di Amuay a confirma cu algun unidad ya tabata funcionando diasabra, pero cu durante dia a cuminsa un candela den un planta di hydrogen cu ainda no tabata den servicio y a controla e incidente sin victima. E sindicalista Freites a bisa cu e candela na e planta ey a laga ‘daño material considerabel’.
E circuito refinador Venezolano ta sufri di un reduccion substancial di su operacionnan, afecta pa fayonan recurente cu criticonan di e maneho di Pdvsa ta atribui na falta di inversion, robo y mal maneho di e unidadnan.
Amuay, cu hunto cu e bisiña Cardón, ta integra e centro refinador mas grandi di e pais y por procesa 955.000 bpd, tabata procesando crudo na menos di un tercio di su capacidad desde fin di 2017.
