Oficina di Control di Activo Stranhero (OFAC) di Departamento di Tesoro di Merca a emiti un regulacion nobo pa proteccion di Citgo.
E statuto nobo ta impedi ehecucion di accion di embargo di e tenedornan di bono 2020 di Pdvsa contra activo di Venezuela. Specificamente, ta prohibi ehecucion di sentencia di corte o veredicto (laudo) arbitral cu ta afecta propiedad Venezolano, a pesar di cu ta trata di medida dicta pa algun tribunal. “A menos cu e ta autorisa pa un licencia specifico emiti pa OFAC, di conformidad cu e parti aki,” e texto ta bisa.
E medida ta reitera y profundisa un status di proteccion di e activonan Venezolano, specificamente orienta riba e situacion di Citgo. E accionnan di e compania a keda poni como garantia pa e bono 2020 emiti pa Pdvsa. E emision ey a tuma den condicion iregular, ya cu e prestamo no a haya aprobacion di Asamblea Nacional.
E regulacion lo drenta na vigor desde 22 di november 2019. E ta intenciona como un capa di proteccion nobo pa Citgo Petroleum Corp. y su filialnan contra e atakenan di varios tenedor di bono cu despues cu e bono a vence ta busca manera pa cobra nan inversion.
Esaki no ta e prome medida cu Departamento di Tesoro ta tuma pa proteccion di Citgo. Na october pasa, tres dia prome cu e vencimento di e bono Pdvsa 2020, a emiti un decreto cu a blokea pa tres luna cualkier forma di embarga e compania petrolero.
