E prome cargamento di ayudo humanitario pa Venezuela a yega ayera na Aeropuerto Internacional Simon Bolivar di Maiquetia.
E ayudo, cu ta coordina pa Comite Internacional di Cruz Cora, y ta bin di e organisacion aki na Panama, lo ser distribui na 28 hospital di e pais y na 8 centro di atencion primario.
E Comite di Cruz Cora a indica cu e ayudo lo ser hiba pa henter e pais pa e situacion grave cu e Venezolanonan ta enfrenta.
E autoridadnan encarga cu maneha e ayudo a indica cu ademas di medicina, e cargamento ta contene generatornan di electricidad.
Esaki no ta trata di e ayudo humanitario cu gobierno di Merca y otronan a recolecta na Cucuta, Colombia, na frontera cu Brasil (estado Roraima) y na Curaçao, cu te na e momento aki no por drenta Venezuela pasobra presidente de facto Nicolas Maduro no ta permiti esey.
E senador Mericano Marco Rubio, a sigura ayera cu e yegada di e ayudo humanitario ta e resultado di e campaña di presion di presidente encarga Juan Guaido y di Asamblea Nacional, referiendo na e yegada di e cargamento di ayudo treci pa Federacion Internacional di Cruz Cora.
El a añadi cu durante varios aña y te algun dia pasa e regimen di Maduro tabata nenga di acepta cu e situacion na Venezuela ta di un crisis humanitario.
