(LaPatilla/Reuters) – Representantenan di sector agricola y agroindustria di Venezuela a bisa diahuebs cu nan a pidi regimen Chavista pa permiti nan importa diesel pa por combati e actual escasez di diesel na e pais, cu ta afectando produccion y distribucion di alimento. Ley di hidrocarburo di Venezuela ta reserva derecho di comercio internacional di crudo y producto petrolero na estado y empresa estatal. Pero gruponan cu ta representa ganadero y productor di lechi a bisa cu na tabata tratando di haya autorozacion temporal pa empresa priva por importa, debi na e crisis actual.
“Nos kier pa nan duna e productornan e posibilidad, al menos temporalmente, den e circunstancianan aki, pa mantene nan mes a flote,” asina Armando Chacin, presidente di e Federacion di Ganadero, Fedenaga, a conta Reuters. Di banda di Pdvsa y Palacio Miraflores no tabatin respuesta riba peticion di Reuters pa comentario.
Na october 2020, gobierno Mericano a termina un exencion riba e sancionnan contra Pdvsa, cu tabata permiti intercambio di diesel pa crudo, di cual varios empresa internacional tabata, manera Repsol, tabata haci uso. Actualmente e prohibicion aki, combina cu e fayo den operacion di loke a keda na capacidad di refinacion na e pais mes, ta causando un escasez fuerte di diesel, cu ta afecta tambe e sector agropecuario.
Venezuela desde november aña pasa, no a ricibi diesel mas di exterior, segun documento interno di Pdvsa cu Reuters a haya pa mira. Tin un racionamento di diesel tumando lugar nan e stacionnan di servicio.
Roger Figueroa, presidente di Cavilac, e gremio cu ta representa e productornan di producto lacteo, a bisa Reuters cu hopi productor tin seis siman sin ricibi diesel y a adverti cu e inventario di lechi den e supermercadonan pronto por keda agota. E productornan di sucu no a haya aprobacion pa nan peticion di importa diesel for di Colombia.
