Organisacion di Pais Productor di Petroleo (OPEC) a caba di publica su Boletin Mensual di Mercado Petrolero pa augustus 2020, den cual ta mustra cu produccion di petroleo di Venezuela ta constante, pero na un nivel bastante abao di 340.000 bari pa dia (bpd) comparable cu e produccion na luna di juni y juli, segun fuentenan secundario.
Compara cu e mesun luna na 2019 e caida den produccion tabata 387.000 bpd. Ministerio di Petroleo a indica cu produccion di petroleo tabata na 396.000 bpd na augustus, sin tanto variacion cu e dos lunanan anterior. Mester resalta cu e cifranan di e fuentenan secundario y di e ministerio no ta desvia tanto di otro, cu un maximo di 16%.
Di e manera aki Venezuela a produci 1.630 miyon bpd bao di e cuota asigna pa OPEC di 1,97 miyon bpd, aunke OPEC ya no ta contando Venezuela den e recortenan di produccion acorda desde augustus 2018.
Pa director ehecutivo di Inter-American Trends, Antonio de la Cruz, “e variacion di e produccion di petroleo ta relaciona cu e falta di almacenamento di crudo. Pasobra e tankinan ta yen di crudo caba esaki ta obliga Pdvsa limita produccion di crudo. Tambe esaki ta relaciona cu e caida te na cero di e actividad di plataforma di perforacion den e camponan petrolero”.
Ademas, e director ehecutivo di Inter-American Trends a señala cu “na augustus Venezuela a exporta 257.000 bpd di petroleo, segun TankerTrackers.com”. Un caida di 6% compara cu e luna anterior.
Na augustus India, Spaña, Italia, Cuba y destinonan desconoci a ricibi e exportacion di crudo di Venezuela, cu India esun mas grandi cu 2,9 miyon bari.
