(LaPatilla/EFE) – Produccion di petroleo na Venezuela a baha cu 72.000 bari pa dia (bpd) den tercer trimester di e aña aki, compara cu e periodo anterior, un caida di 9 %, segun dato di e informe di Organizacion di Paisnan Exportador di Petroleo (OPEC), difundi e siman aki. Entre juli y september, Venezuela a produci un promedio di 673.000 bpd, mientras cu entre april y juni a logra extrae un promedio di 745.000 bpd.
E produccion di crudo na september a promedia na 666.000 bpd, es decir, 57.000 bpd menos compara cu augustus, cu a mira un produccion di 723.000 bpd, segun e informe di OPEC, cu ta refleha e cifranan reporta pa gobierno di Venezuela. Cu e datonan aki, Venezuela ta sigui aleha di e meta fiha pa presidente Nicolas Maduro di produci 2 miyon bpd na fin di 2022 y di 3 miyon pa 2023.
E pais na 1997 tabata un productor mayor na mundo, cu un produccion di 3,2 miyon bpd, pa despues durante gobierno Chavista mantene un nivel di 2 miyon bpd durante casi i20 aña, pa despues collapse completamente te na e nivel actual, principalmente den ultimo cinco aña. E acumulacion di falta di inversion, di mantenimiento, corupcion, maneho infiltra pa politica cu a crea un payroll insostenible, ademas di e sancionnan Mericano cu den ultimo añanan a cera mercado Mericano, entre otro pa Citgo, pa crudo y producto petrolero di Venezuela.
Mercadonan principal pa e produccion limita di Venezuela ta China, India y Iran, di cual e ultimo aki ta haci entrega di diluyente necesario pa mezcla cu e crudo ultrapisa di Orinoco, cu ta percura pa mayoria di produccion actual.
