E aña aki produccion di maishi lo por cubri solamente un tercio di e demanda nacional, debi na insuficiente materia prima y otro material pa por sembra, loke ta crea e perspectiva di mas escasez di producto deriva di e cereal aki, y como agravante, restriccion severo pa importacion.
Di acuerdo cu declaracion di prome vice-presidente di Fedeagro, Celso Fentinel, a yega na e pais solamente 160.000 saco di maishi pa e ciclo di siembra, mientras e pais mester mas di un miyon saco pa cubri – razonablemente – e demanda nacional, segun e medio Banca y Negocios. E dirigente gremial ta indica cu e materia prima cu e yega na e pais ta sirbi solamente pa garantisa un operatividad minimo di algun productor priva, pero mas di 80% di e productornan no lo por sembra pa falta di materia prima, fertilizante y repuesto pa nan makinaria.
Produccion nacional di maishi ta pasa apenas 1 miyon tonelada anual, cifra cu ta representa un caida di 65% den ultimo 10 aña. Un nivel di produccion adecua lo ta alrededor di 3,5 miyon tonelada, pero Fedeagro ta mantene e opinion, cu den e actual condicionnan e cosecha no lo haci nada otro cu cay mas ainda.
E gremio nacional di productor agricola ta insisti den su advertencia encuanto e creciente deficit di produccion di alimento y den su demanda di ricibi mas recurso pa reactiva actividad, pero te awor nan reclamonan a ser ignora.
