Por lo menos 150.000 bari di gasolin diario no ta sali mas di e Compleho Refinador di Paraguana, despues cu un blackout grandi dia 6 di juli ultimo a tuma luga den e compleho, cu ta produci su propio electricidad.
Ivan Freites, secretario di Federacion Unitario di Trahador di Pdvsa, a afirma cu e pais ta adkiri e gasolin cu ta consumi a traves di un intercambio cu empresanan petrolero di paisnan amigo.
“Nos ta cambia 1 miyon di bari di crudo cu Rusia pa 250.000 di gasolin. Nos ta dilanti un sakeo nunca bisto. Nos ta depende di e importacion pa por abastece nos mes,” Freites a bisa den un entrevista pa Fedecamaras Radio.
Freites a insisti cu na actualidad ta imposibel recupera e industria petrolero, pasobra un di e tanto problemanan cu ta presenta ta e renuncia masal di empleado.
“Lo mester di 25.000 trahado profesional pa hiba produccion na e nivelnan di 1998 y mas di 50 empleado di Amuay y Cardon a renuncia den ultimo simannan pa e condicionnan pesimo laboral,” el a agrega.
Di otro banda tin informacion cu Venezuela a exporta na juni alrededor di 860.000 bari pa dia, mas 90.000 bpd di otro likido, segun informacion di den Pdvsa cu Argus a haya.
Exportacion tabata mas cu e produccion di crudo calcula na aproximadamente 750.000 bpd na juni, a base di un acumulacion di inventario pa e ‘bottleneck’ den transporte causa pa e sancionnan Mericano y e problemanan logistico na e terminalnan di exportacion di Pdvsa den e lunanan anterior.
