Segun Boletin Mensual di organisacion di paisnan productor di petroleo OPEC, Venezuela a logra aumenta su produccion di petroleo un poco, di 382.000 bari pa dia (bpd) na october, te na 407.000 bpd na november, segun fuentenan independiente o secundario consulta pa e organismo.
Cu esaki produccion di petroleo Venezolano a aumenta cu 25.000 bpd (6,5%) compara cu e luna anterior. Compara cu november 2019 esaki ta mustra un caida di 310.000 bpd (43% menos). Segun ministerio di Petroleo (den comunicacion directo cu OPEC) a indica cu e produccion di petroleo tabata na 434.000 bpd na november, 39.000 bpd menos cu loke gobierno Venezolano a indica na october. Y un diferencia di 27.000 bpd compara cu e fuentenan independiente.
Venezuela a produci 1.563.000 bpd bao di e cuota asigna pa OPEC di 1.970.000 bpd, fiha den e reunion di november 2016, aunke desde november 2018 Venezuela a keda for di e recortenan nobo di produccion di e cartel, ya cu di tur manera nan no tabata alcanza nan cuota. Pa director ehecutivo di Inter-American Trends, Antonio de la Cruz, “produccion di petroleo di Venezuela ta stanca despues di e segundo trimester di 2020, entre 400 y 500 mil bpd. Loke lo haci su recuperacion dificil na 2021”.
Ademas, de la Cruz a indica cu “na november Venezuela a exporta 441.000 bpd di petroleo, segun e agencia TankerTrackers.com”, cu ta un aumento di 71% compara cu e luna anterior.
Na november China tabata e destino principal di crudo Venezolano cu 11 miyon bari, despues ta sigui Malasia, Emiratonan Arabe Uni (pa promer vez) y Cuba.
