Produccion di crudo di Venezuela a keda na 608.600 bari pa dia (bpd) dia 3 di october 2019, segun un informe interno di ministerio di Petroleo (Minpet) cu lapatilla.com a haya pa mira.
Den su informe Minpet ta bisa cu ta observa “un produccion bao di loke a planifica, debi na e condicion actual di e Sistema Electrico Nacional (SEN), mayormente den parti di occidente di e pais. Ta mira un disminucion di mas di 200.000 bpd cu tendencia di sigui baha, producto di e ciere di produccion den Faha di Orinoco y Occidente, como consecuencia di e inventarionan halto, causa tambe pa e falta di barco pa exporta crudo, tanto na nivel internacional como den cabotahe (transporte interno) pa e refinerianan.”
Ministerio di Petroleo a pone como obhetivo un produccion total di 1.615.000 bpd pa october, pero e produccion real ta yega apenas na 37% di e obhetivo.
Segun e informe di Minpet, e produccion di crudo na Occidente di e pais tabata 163.200 bpd pa dia 3 di october, un caida di 19.600 bpd compara cu e dia anterior. Petroboscan, na costa occidental di Lago di Maracaibo, a baha produccion pa limitacion den capacidad di almacenamento na e terminal Bajo Grande. Riba costa oriental di Lago, tabatin fayo di ekipo compresor y un blackout na Machango a afecta siete bloke productivo.
E informe di Minpet ta alerta cu “desde 17/09 en adelante, ta mira un bahada di produccion promedio di un poco mas di 200.000 bpd debi na falta di electricidad, entre otro problema.
