E deficit grave di combustibel pa motor na Venezuela ta cuminsa afecta e propio produccion di crudo na e pais, ya cu e trahadonan di petroleo mes ta lucha pa yega na nan puesto di trabao y e ekipo y material pa produccion no ta yega na e camponan di petroleo.
E crisis di combustibel por pusha produccion den direccion negativo, bao di e promedio dialuna di mei di 741.000 bari pa dia (bpd), asina funcionarionan halto di e sindicato petrolero ta adverti.
E consumo domestico di gasolin na Venezuela desde 15 di juni a baha te alrededor di 80.000 bpd y di diesel te alrededor di 60.000 bpd, compara cu e consumo maximo di 300.000 bpd di gasolin y 190.000 bpd di diesel na 2014, segun un memorandum interno di ministerio di petroleo cu Argus a haya pa mira.
E memorandum ta atribui e caida di consumo di combustibel na “collapse operacional” di e refinerianan di Pdvsa y na e hecho cu e compania no a reemplasa e productonan refina cu antes tabata importa di Merca, y cu awor ta prohibi pa e sancionnan Mericano, cu producto proveniente di proveedornan no Mericano.
E buraco den suministro lo ta pio ainda si no tabata pa e contraccion grandi den economia di Venezuela cu a golpia demanda, y e collapse di casi dos tercio di e flota di vehiculo motorisa di e pais di aproximadamente 5 miyon vehiculo, segun un funcionario di ministerio di Petroleo.
Dirigentenan sindical di Pdvsa den e estadonan productor di petroleo Zulia, Guarico, Anzoategui y Monagas a conta Argus cu e deficit di combustibel den nan areanan operativo a obliga e compania pa suspende dos siman pasa silenciosamente tur servicio di transporte interno cu a resta ainda pa e trahadonan.
