Mientras cu no tabatin claridad si e negociacion na Barbados entre gobierno di Nicolas Maduro y gobierno interino di Juan Guaido lo a continua, a cuminsa presion di varios banda pa no bandona mesa.
Union Europeo a menasa ayera di impone sancionnan nobo na e regimen si e negociacion na Barbados, cu lo a keda reanuda ayera, no duna resultado cu ta permiti un salida di e crisis actual na e pais. Union Europeo ademas a declara cu ta respalda e informe di e Alto Comisionado di Nacionnan Uni pa Derecho Humano, Michelle Bachelet, encuanto violacion di libertadnan fundamental na Venezuela di parti di regimen di Nicolas Maduro.
Ministro di Asunto Exterior di Venezuela Jorge Arreaza, cu ta parti tambe di e delegacion di Nicolas Maduro den e mediacion cu representante di Juan Guaido, a reacciona rechasando e declaracionnan di e representante di Union Europeo, Federica Mogherini. Arreaza a sigura cu e posicion tuma pa e Hefe di Diplomacia Europeo ta un intromision nobo den asunto interno di Venezuela, na momentonan crucial pa e nacion. El a agrega cu Union Europeo ta emplea sancion como mecanismo di extorsion politico, cu e meta di faborece e personanan cu ta di acuerdo cu un intervencion militar na Venezuela.
Sin embargo, Presidente interino Juan Guaido a declara ayera cu e ta sperando un notificacion di Noruega tocante continuacion di e negociacion, ya cu ta Noruega so por haci esaki. Fuentenan cerca di e negociacion a conta El Nacional ayera cu e siman aki ta reanuda e negociacion, sin embargo, en todo, caso no ayera.
E corant Spaño ALnavio a anuncia ayera di a haya confirmacion cu e negociacion ta sigui awe diaranson, despues cu e delegacionnan a pasa un siman na Caracas pa consulta. ALnavio ta mustra riba presion fuerte di Rusia y China riba regimen di Maduro pa yega na un solucion politico.
