Presidente di Colombia, Ivan Duque, den su discurso na e Conferencia Ministerial di Hemisferio di Lucha contra Terorismo teni na Bogota, a critica regimen di Nicolas Maduro pa e proteccion cu ta duna na gruponan terorista y paramilitar den teritorio Venezolano.
“Awor mas cu nunca e coordinacion entre e paisnan mester permiti nos identifica e gruponan terorista y desmantela nan,” Duque a declara.
“Accion contra terorismo no a nace awe, pero awor nos mester fortalece e accion mas y e mester sirbi pa aumenta forsa den henter e region.”
“Pa ningun hende ta un mentira cu aki den e hemisferio aki nos ta mirando claramente (…) cu Nicolas Maduro ta alberga grupo den su teritorio manera FARC, ELN, cu ta reclutando mucha y traficando arma, y ta participando den rednan grandi pa fortalece e dictadura, esey mester yama atencion di nos tur den e region aki.”
“Te ki dia nos mester keda mira e actonan delincuente aki? P’esey e alianzanan aki ta importante.” “Colombia ta (…) e unico miembro socio di NATO cu por habri caminda pa otro paisnan por haci algo, pa nan comparti opinion pa mehora siguridad den e region. E conferencia aki mester hiba nos na adapta medida pa mehora siguridad den e region.“
Duque a resalta tambe presencia di Juan Guaido y a honra su lucha contra dictadura di Nicolas Maduro. El a subraya cu e meta ta yega na un transicion pa eleccion liber y democratico. Tambe cu Colombia lo keda duna tur apoyo na Guaido y oposicion Venezolano.
Secretario di Estado di Merca, Mike Pompeo, a bisa cu e ta considera “inaceptabel” e relacion di regimen di Nicolas Maduro cu varios grupo terorista, entre nan e organisacion Islamico Hezbollah.
E canciyer a condena e proteccion di e tipo di delincuente aki den teritorio Venezolano y a reitera cu ta importante colabora pa combati esaki.
