E Barometro Global di Corupcion na America Latino y Caribe 2019, publica pa Transparency International, a señala Venezuela como e foco mayor di corupcion di e continente, segun nan informe, cu a constata cu gran mayoria di e Venezolanonan ta percibi presidencia di e pais aki como e institucion mas corupto.
E indice halto di percepcion di e corupcion existente na Venezuela ta keda invariable compara cu e informe di aña pasa, segun e Barometro Global di Corupcion (GBC) na America Latino y Caribe, cu den su ultimo edicion ta relata cu 87% di Venezolano cu ta considera cu corupcion na nan pais ta aumentando, mientras cu 93% ta cataloga esaki como e problema mas grave.
E encuesta, realisa entre januari y april 2019 na mas di 17.000 ciudadano mayor di 18 aña, den 18 pais di e region (na Venezuela a encuesta 1.000 persona entre maart y april), ta duna muestra tambe di un creciente desintegracion politico na e pais, registrando cu e ciudadanonan ta considera cu e mayoria di persona den e institucionnan di gobierno ta corupto. Esaki ta cubri entre presidencia, cu ta na prome lugar y cu un score cu a pasa di 63% pa 87% na 2019, sigui pa empleado publico, Asamblea Constituyente, polis, hues y magistrado.
Den e informe di 2018 e prome puesto tabata pa efectivonan di seguridad, cu awor ta pa presidencia. Aunke cuerpo policial no ta esun mas mal mira pa corupcion na 2019, e porcentahe di persona cu ta bisa cu nan a bira victima di soborno na man di e instancia aki, a bay di 41% na 2017 te 62% na 2019.
Despues di Venezuela na prome lugar ta sigui Republica Dominicana, Peru, Trinidad y Tobago, Panama, Brasil, Chile, Honduras y Colombia, cu tin score di riba 50%. Barbados es ta e pais cu miho percepcion di corupcion pa su ciudadanonan.
