(LaPatilla) – Instituto de Altos Estudios Sindicales (Inaesin) di Venezuela a alerta ariba e aumento di casonan di depresion entre trahadonan Venezolano door di e salario abao cu nan ta ricibi.
E representantenan di Inaesin a alerta cu e trahadonan di administracion publico ta esnan mas afecta econmica-, social- y psicologicamente door di e salarionan abao. Nan a enfatisa cu ta trata di un problema di salud publico.
E reduccion fatal di e salario y e perdida di poder di compra a genera na Venezuela un fase cruel y negativo, un circulo vicioso di sobrevivencia cu a hiba na corupcion algun empleado publico cu ta recore na e maneranan aki pa soporta e crisis.
Por ehempel, haci un tramite legal (cu ta derecho di tur Venezolano), manera saca un cedula di identidad, paspoort of obtene un acta di nacemento, entre otro tramitenan, ta wordo obteni pagando e empleadonan di e institucionnan aki “bao mesa”. Si no, e proceso di e tramitenan aki ta hopi largo y dificil, te na e punto cu por hasta keda sin ricibi e documento.
Esaki a genera un clima di corupcion den e sociedad, caminda a perde respet pa e condicion humano y e institucionnan publico. E era di sobreviviencia a cuminsa.
E trahadonan dependiente di entidadnan gubernamental ta destina na biba cu un salario di hamber di 7mil bolivar pa luna plus un bonus di alimentacion di 3mil bolivar. E cifra integral di 10 mil bolivar tabata ekivalente na 3.50 dollar, awe den 2022 e ta 2 dollar, e salario mas abao di e continente.
