E situacion na Venezuela ta keda preocupante y ademas ta incierto loke ta bay sucede proximamente. Ya a pasa dos luna caba despues cu Juan Guaido a asumi presidencia interino di e pais, en vista di falta di poder ehecutivo legitimo.
A sigui un cantidad di declaracion di reconocimento, di paisnan di e continente aki y di Europa. Sin embargo, te awe e regimen di Nicolas Maduro no a sucumbi, e parti mayor di e forsanan arma a keda leal na e gobierno socialista, y e pais a keda riba e rumbo di un economia cada biaha mas den decadencia, y un poblacion sufriendo cada dia mas. Si por a pensa cu e pais a yega na e limite di loke e por soporta, ta resulta cu tin efectivamente un situacion mas grave ainda.
Esaki ta haci cu e strategia obvio di Estadonan Uni pa strangula e regimen economicamente, principalmente a traves di tranca e industria petrolero, no a surti e efecto cu tabatin pensa na inicio. E opcionnan cu tabatin pa bende crudo cu otro cumprador tabata suficiente en todo caso pa duna e crudo cu tabata bay pa Merca un destino diferente. E ayudo cu e regimen ta hayando di gobierno di China, y specialmente Rusia, a resulta suficiente pa keda riba pia. Ademas e ayudo Ruso no ta limita na petroleo so, sino cu ta parce cu nan ta asumiendo papel di e Cubanonan pa loke ta apoyo militar, na un nivel cu e Cubanonan, pa solidario cu nan ta cu e causa revolucionario comparti, no por brinda. Nan aporte tabata mas den area di inteligencia, incluyendo inteligencia militar pa mantene control riba e forsanan arma. E impresion ta cu e control ey a funciona, loke por ta un splicacion pakico te awor no tabatin tanto militar y polis cu a dicidi di deserta y purba sali di e pais. Ta parce cu e apoyo militar Ruso ta bayendo den direccion di crea un defensa contra un posible invasion, cu entrada di defensa anti-aereo sofistica, incluyendo misil anti-aereo. Tambe ta trahando riba mas entrenamento di piloto pa maneha e avionnan Ruso cu ta presente caba, mientras tin mas pa bin.
E creciente apoyo di Rusia na regimen di Maduro no por a keda sin contesta di banda Mericano, cu te na e momento aki tabata mas tanto den palabra, inclusive e ya famoso frase cu “tur opcion ta riba mesa.” No cu Merca a sinta keto sin haci nada. A busca mas tanto apoyo posible di aliadonan, por ehemplo e acercamento cu gobierno Hulandes pa cera un tratado cu Curaçao pa usa e teritorio insular aki como centro logistico pa e ayudo humanitario pa Venezuela. No ta trata di esey so, pero e islanan, Aruba tambe, pa hopi aña caba ta punto di apoyo pa forsanan aereo Mericano den region. E accionnan Ruso di e ultimo simannan, y e creciente rabia Mericano pa esaki, por crea rapidamente un situacion unda cualkier incidente por ta e candela pa cende e mecha.
Esey ta implica cu nos ta na vispera di un guera total entre e dos potencianan mundial? No necesariamente. Di banda di Rusia nan ta comprende masha bon cu, si cos yega na un conflicto arma, nan ta den un posicion desfaborable pa loke ta logistica. Ta dificil pa kere anto cu nan lo core riesgo di termina den tal situacion. Loke nos por haya ta un ripiticion di e situacion na Crimea di algun aña atras, tempo cu Merca gruñando mester a para mira Rusia anexa teritorio di otro pais. Rusia anto ta moviendo su piesanan, pero sabiendo cu den e enfrentamento final nan no por gana.
Tin tambe un otro banda di e asunto pa tuma na cuenta. Esey ta e situacion politico na Merca mes. Banda di cu e salida di e rapport di investigador special Robert Mueller lo percura pa basta boroto ainda, e mero hecho cu presidente Trump ta ‘off the hook’ pa loke ta hecho castigable, ta haci cu en todo caso politica Mericano lo no ta landa den un lama di controversia interno. Tambe presidente Trump tin menos di dos aña pa bay, y cu un Camara di Representante den man di e Democratanan, e lo mester yega na un forma di dialogo cu e partido opositor, si e ta desea di pasa legislacion di importancia ainda durante e periodo di gobernacion aki. Y si tin un tema riba cual e dos partidonan tin un opinion casi unanime, ta e caso Venezuela. Un acercamento den Congreso por bien cuminsa anto riba e tema aki, habriendo caminda pa mas accion, inclusive e opcion di un intervencion militar.
Mientras tanto, na Venezuela mes tin discusion caba tocante e uso di articulo 187 di Constitucion Venezolano, cu ta contempla e permiso pa laga forsa militar di otro nacion opera den teritorio nacional. E permiso ta coresponde na Asamblea Nacional. Esey no lo sucede sin mas. Mientras cu gobierno di Maduro no ta tribi mishi cu Guaido, pasobra nan sa ki consecuencia esey lo tin, e situacion di e momento aki por permanece pa basta tempo. Pero tambe cualkier incidente por pone tur cos na candela.
