Segun expertonan petrolero consulta pa e agencia di noticia Infobae, ya gobierno di Nicolas Maduro a cuminsa usa strategia cada vez mas ingenioso pa trata di obtene algun barco cu combustible.
Un di e strategianan ta pa reactiva parti di su flota di tanker tranca, lo cual anteriormente a resulta den e confiscacion di embarcacion petrolero pa falta di pago, por ehemplo e caso di El Parnaso, poni na cadena na Portugal.
Recientemente, e barco transportador M/V GPO Grace, a yega di Aruba pa traslada e barconan Yavire y Paramacay pa Turkia pa haci reparacion mayor. E pais ey no ta reconoce e sancionnan imponi riba Venezuela pa gobierno Mericano.
Sin embargo, e embarcacionnan fleta pa empresanan comercial pa trece gasolin pa Venezuela no ta abunda, al contrario, nan ta scars, ya cu mayoria di e empresanan ta teme di bira obheto di sancion pa gobierno Mericano, si nan viola e sancionnan imponi. Asina e lista di proveedor a bira mas cortico, te na un nivel alarmante.
E consecuencianan den e pais a bira mas visible den interior unda ta normal pasa 8 o mas ora den fila wardando turno na pomp di gasolin. Hasta tin caso unda hende ta pasa varios dia den rij, drumiendo den nan vehiculo. Esaki tin efecto tambe riba e ausencia di hende na trabao loke no ta contribui na e situacion economico.
Mientras por observa un hermetismo di gobierno encuanto e tema aki, analistanan geopolitico ta pintando caba un scenario terible a corto plazo: den e anterior nacion di abundancia di petroleo ta existi e riesgo cu lo no tin gasolin mas, sigur den interior di e pais.
