Agencia di calificacion financiero Standard & Poor’s Global Ratings a baha e nota di debe di Venezuela, di CCC pa CCC-. SP Global a bisa cu Venezuela tin un riesgo di default pa proximo 6 luna, pa su situacion di crisis politico y financiero.
“E nota cu a baha ta mustra un degradacion den condicion economico, como tambe mas tension politico, incluyendo den e grupo chavista cu ta den gobierno, y un gobierno deteriora relaciona cu su likides.” E agencia ta splica cu tin un perspectiva negativo riba Venezuela. E nota a baha na un plaso medio y ta mustra un riesgo di default (…) den proximo 6 luna, si condicionnan na Venezuela no mehora significativamente, S&P a bisa. Agencia S&P tin temor cu Venezuela no lo por financia su mes den mercado internacional, y e no lo por paga su debe den futuro. Venezuela tin hopi aña afecta caba, pa e prijs hopi abao di petroleo. “Si nan no tin un financiacion exterior nobo y consecuente, nos ta kere cu gobierno di Venezuela lo tin problema pa paga 2.800 miyon dollar di debe na di dos semester di 2017, y 7.000 miyon dollar di aña 2018,” S&P a splica. E agencia ta anticipa un contraccion di 6% di producto interno bruto (PIB; GDP) pa e aña aki”. Pa mas di tres luna, miles di persona ta protesta riba caya y caretera di Venezuela contra gobierno di Nicolas Maduro, cu ta heredero di Hugo Chavez. Maduro a yama henter pueblo pa participa den un proceso di eleccion dia 30 di juli, pa asamblea constituyente. Te awor casi 100 persona a muri durante enfrentamento cu efectivo di seguridad. “Awor na Venezuela nan institucionnan ta debilita, poblacion ta hopi malcontento (…) y pa tal motibo e capacidad di Venezuela pa soluciona problema urgente riba tereno economico y social ta reduci,” S&P a splica.
