Venezuela: Pobresa a mas cu redobla den apenas cuatro aña

(lapatilla.com/EFE) – E encuesta encuanto condicion di bida na Venezuela (Encovi) realisa pa e principal universidadnan di e pais y presenta diaranson pasa na Caracas,a revela cu pobresa extremo a aumenta na e pais di 23,6 % pa 61,2 % den cuatro aña y casi 10 % entre 2016 y 2017 so caba.

E informacion a ser ofreci pa e sociologo Maria Gabriela Ponce, di Universidad Catolico Andres Bello (UCAB), ken a encarga su mes cu e datonan tocante e aumento di pobresa den cuadro di e  Encovi, un encuesta cu ta realisa desde 2014 y cu na 2017  a encuesta 6.188 hogar na henter e pais.

Ponce a exhibi un grafico den cual por observa cu na 2014 pobresa extremo tabata na 23,6 %, na 2015 na 49,9 %, na 2016 na 51,5 % y na 2017 a yega 61,2 %.

Den e mesun grafico aki ta mira cu e hogarnan no pober na 2014 tabata representa 51,6 % di e hogarnan consulta, na 2015 nan tabata 27 %, na 2016 e cantidad a baha te 18,2 % y na 2017 a yega na 13 %.

“Desde cu nos a cuminsa cu e Encovi na aña 2014 e pobresa (entre cronico y extremo) tabata na  48,4 % y cuatro aña despues , na 2017, pobresa, a base di entrada (pa hogar) ta na 87 %”, el a bisa.

El a splica cu e proporcion mayor ta den categoria di pobresa extremo y esaki ta referi na “e hogarnan cu entrada cu no ta duna pa paga por lo menos e costo di alimentacion, es decir, e hogarnan den cual e sobrevivencia biologico di nan miembronan ta comprometi.”

E encuesta Encovi a ser realisa cu informacion obteni entre juli y september, por lo tanto e investigadonan ta bisa cu e resultadonan no ta refleha e efecto riba e Venezolanonan di e hiperinflacion cu a cuminsa na luna di october.

Ponce a señala cu den e contexto hiperinflacionario, e mayoria di e hogarnan Venezolano lo biba bao di un linea di pobresa, pasobra e salarionan no por adapta na e velocidad di inflacion.

E situacion segun Ponce por implica e desaparicion di e clase medio den termino economico.

El a indica tambe cu e situacion ta mas grave den e ciudad y pueblonan chikito unda e pobresa a aumenta te 75 %, “loke ta implica cu 3 di 4 hogar ta pober riba varios aspecto, es decir pober pa varios necesidad pareu, mientras cu na Caracas ta solamente 1 di cada 4 hogar.”