(LaPatilla) – Empresa estatal Venezolano PDVSA y e empresa Mericano Chevron a realisa un reunion di trabao cu obhetivo di fortalece e produccion conhunto di petroleo, segun presidente di e estatal, Rafael Tellechea, a informa.
A traves di su cuenta oficial di Twitter, e funcionario a cualifica como ‘exitoso’ e reunion cu e ekipo di Chevron di Venezuela cu ta lidera pa su presidente, Javier La Rosa.
Tellechea, cu a comparti ariba e red social menciona imagennan di e encuentro, no a ofrece ningun otro detaye tocante e reunion di trabao aki cu e representantenan na Venezuela di e petrolera Mericano, cu cual PDVSA a suscribi, den luna di december ultimo, contractnan pa e continuacion di e produccion petrolero.
Na final di luna di november, e gobierno Mericano a anuncia e autorisacion na Chevron pa retoma operacion limita di extraccion di recursonan natural na Venezuela, como resultado di e reanudacion, despues di un aña di suspension, di e dialogo entre e regimen di Nicolas Maduro y e oposicion na Mexico, un proceso cu ta pega ainda desde e momento ey.
E produccion di crudo di e nacion Caribense a subi cu un 7.4% luna pasa compara cu luna di maart, ora cu el a pasa di 754 mil bari pa dia (bpd) pa 810 mil bpd, segun fuentenan oficial a indica den un rapport di e Organisacion di Paisnan Exportador di Petroleo (OPEP).
