(ElNacional/ArmandoInfo) – Den e afan pa evadi e sancionnan di Merca, gobierno di Venezuela y e empresa estatal Pdvsa a pone gran parti di benta di petroleo den man di intermediario via ken e empresa tabata trata di yega na bende su crudo, sin cu tabata detecta esaki. Awor ta bin resulta cu un parti sustancial di e placa cu a cobra den e transaccionnan ey, no a yega den caha di e compania.
Segun e medio cu a investiga esaki, a base di decenas di documento cu a sali di Pdvsa mes, miyones di bari di petroleo Venezolano tabata sali di e muellenan di e refinerianan Venezolano, pero tabata parce cu envez di bende nan, nan tabata evaporea y Pdvsa no tabata ricibi e placa. E documentonan ta destapa e resultado di cede e comercializacion di petroleo Venezolano na ‘traders’ y intermediario di tur tipo, como respuesta na e sancionnan Mericano, imponi na 2019.
E fracaso di e strategia sigui pa e ministro di Petroleo, Tareck El Aissami, y e Vice-presidente di Comercio y Suministro di Pdvsa, mayor di Ehercito Antonio Perez Suarez, ta expresa den un cifra: 8.406 miyon dollar cu ta ainda den e apartado di “cuentas por cobrar” di Pdvsa, pa e crudo comercializa desde 2019 te augustus 2022. E magnitud di e cuentanan ey ta tal cu ta supone cu ta poco mas di 80% di e 10.135 miyon dollar cu Pdvsa mester a ricibi pa e despacho di al menos 201 miyon bari bao mecanismo di ‘cobranza anticipa o cash’. E deficit por ta ainda mas grandi si conta acerca e facturanan pendiente den concepto di “compensacion”, cual ta e casonan unda intermediarionan ta paga e valor di e petroleo cu mercancia manera alimento o cubriendo debe di Pdvsa mes.
Esey tabata, por ehemplo, e manera di opera di e empresarionan Colombiano Alex Saab Moran y Alvaro Pulido Vargas, tras di e fachada di companianan Mexicano, cu mester a percura pa compra y envio di alimento pa Venezuela.
