Pdvsa a agota su capacidad di almacenamento y awor ta considerando usa excavacion of otro area adecua pa warda crudo na aire liber, mirando e problema di no tin mas espacio di almacenahe normal. E sancionnan di Merca ta mantene Venezuela fuera di mercado di exportacion, segun varios funcionario di produccion y comercialisacion.
Un comision presidencial crea dia 19 di februari pa reorganisa Pdvsa a ordena e gerentenan di nivel superior pa identifica cualkier instalacion di almacenahe no usa ainda cu por drecha rapidamente y pone den servicio atrobe.
E buskeda urgente di gobierno di infrastructura di almacenahe recuperable y e discusionnan interno encuanto e viabilidad di ‘tankinan’ pa almacena crudo cerca di e camponan petrolero productivo den e divisionnan occidental, oriental y di Orinoco ta sugeri cu e sancionnan secundario di Merca contra Pdvsa ta asfixiando mas ainda e exportacion.
E buskeda di almacena di cualkier manera ta refleha e opcion di gobierno pa no cera e posnan te cu resolve e bottlenecknan den exportacion. E capacidad flotante riba tanker dilanti costa ta un opcion limita, debi na e sancionnan y e flota mas chikito di Pdvsa.
Pdvsa actualmente tin mas di 35 miyon bari di crudo almacena riba tera y lama. Riba papel e compania tin aproximadamente 70 miyon bari di capacidad di almacenahe riba tera.
Pero casi mita di e capacidad a cera durante ultimo decada debi na falta di mantenimento y deterioro di e infrastructura, manera tuberia y pomp.
