Compania estatal Venezolano Pdvsa a suspende operacion di mescla di crudo den su empresa di joint venture PetroPiar, di 210.000 bpd cu Chevron, debi na limitacion di almacenamento, segun varios funcionario di industria petrolero consulta pa Argus.
PetroPiar, un di e cuatro upgradernan di Orinoco, construi na fin di decada di 1990 pa produci crudo mehora principalmente pa mercado Mericano, tabata produciendo alrededor di 130.000 bari pa dia (bpd) di crudo mescla Merey 16ºAPI desde 27 di juli y tabata spera di yega na 170.000 bpd na fin di augustus. Pero produccion tabatin un promedio di menos di 100.000 bpd na comienso di september prome cu e planta a cera, segun un funcionario di e sindicato petrolero na PetroPiar.
E suspension ta relaciona cu e bahada den exportacion y e falta di capacidad di almacenamento operativo, loke ta obligando Pdvsa pa reduci produccion na e posnan. Pdvsa ta luchando pa por comercialisa su crudo acido y pisa, ofreciendo carga cu descuento grandi, pa e sancionnan di Merca cu a haci hopi cumprado aleha, cu excepcion di e empresa Ruso Rosneft. Incluso China a detene temporalmente e carganan den un aparente tactica comercial relaciona cu e disputa comercial mas amplio di Beijing cu Merca.
E ciere di PetroPiar ta bin prome cu e expiracion dia 27 di october di un exencion di sancion Mericano cu a permiti Chevron continua operando na Venezuela a pesar di e restriccionnan Mericano imponi na januari 2019.
No ta cla ainda si Chevron, un di e ultimo socionan di Pdvsa, por continua o mester retira hunto cu algun compania di servicio petrolero manera Halliburton y Schlumberger. E atakenan di 14 di september na Saudi Arabia cu a causa prijs di petroleo subi, por mantene Chevron den tereno pa e momento aki.
