Pdvsa ta ofreciendo e siman aki descuento di 23 dollar pa bari pa benta di su crudo mas conoci, segun operadornan, meymey di un collapse mundial di prijs di crudo. Esaki ta pone mas presion riba e compania estatal, cu ta enfrentando sancion Mericano cu ta dificulta su exportacion. Pdvsa a fiha prijs pa su crudo Merey na inicio di aña entre 16 y 18 dollar pa bari bao di e prijs pa un bari di crudo Brent, pa por atrae cumprado cu tin miedo pa e sancionnan di gobierno di Trump.
Cu Brent sufriendo su caida mas grandi den varios decada pa e deterioro di demanda pa via di e crisis di coronavirus combina cu e guera di prijs cu a cuminsa entre Rusia y Saudi Arabia pa conkista mas mercado. E guera aki por resulta den problema grandi pa Pdvsa cubri su costo di produccion.
Na un prijs di alrededor di 37 dollar pa bari di Brent, e descuentonan ta laga Pdvsa solamente cu 14 pa 18 dollar pa bari pa su crudo. “E ta un tormenta perfecto,” Francisco Monaldi, economista di energia di Universidad Rice, na Houston, ta bisa. “Si e caida di prijs keda prolonga, mi ta mira esey catastrofico pa Venezuela,” el a agrega.
Pa compensa e riesgo, e descuentonan ofreci pa Pdvsa a amplia te entre 18 y 23 dollar pa bari, compara cu Brent, pa benta di Merey 16, un mezcla di crudo extrapisa di Faha di Orinoco y variedadnan mas liviano, principalmente pidi pa refinerianan na Asia. Costo di produccion na Venezuela ta entre 10 y 12 dollar, excluyendo royalty di 33% pa gobierno, segun dos fuente di e industria.
