Un corte federal di apelacion na Merca a rechasa ayera un apelacion di e empresa estatal petrolero di Venezuela Pdvsa, pa anula un orden hudicial cu ta permiti e empresa minero Canades Crystallex cobra, via embargo riba activo di e firma estatal Venezolano na Merca, un indemnisacion di como 1.400 miyon dollar cu e nacion Venezolano debe Crystallex.
Tribunal di Apelacion di Tercer Circuito di Estadonan Uni, na Philadelphia, a bisa cu Corte di Prome Instancia a actua segun su discrecion, uniendo e accionnan di Pdvsa den su subsidiario Mericano, cu ta propietario di Citgo Petroleum Corporation. Crystallex a gana e sentencia como compensacion pa e expropiacion di su activonan na Venezuela na 2008 bao di gobierno di presidente di e tempo ey, Hugo Chavez, cu a fayece di cancer na 2013.
“E Tribunal di Districto a actua dentro di su hurisdiccion emitiendo un escrito di embargo riba e accionnan di Pdvsa y PDV Holding pa satisface e huicio di Crystallex” contra Venezuela y “e accionnan di Pdvsa den PDV Holding no ta inmuno pa e embargo,” Hues Leonard Stark a skirbi, referiendo na e subsidiario Mericano di Pdvsa.
No a keda cla si inmediato Pdvsa lo pidi corte reconsidera e decision o cu ta apela na Corte Supremo di Husticia Mericano. Ni Pdvsa ni ministerio di Petroleo di Venezuela a responde riba solicitud pa comentario.
Nota di redaccion: PDV Holding, cu sede estatutario na Delaware, Estadonan Uni, ta 100% propiedad di Pdvsa, y na su turno ta 100% propietario di Citgo Petroleum Corporation.
