E compania petrolero nacional di Venezuela, Pdvsa, a perde casi tur su capacidad pa refina crudo, cu solamente un parti di e refineria di Amuay, di 635.000 bari pa dia (bpd), actualmente den operacion, segun informenan interno di e compania mustra na Argus.
Na fin di augustus, Amuay tabata procesa 120.000 bpd, aproximadamente 9% so di e capacidad di refinacion na Venezuela di Pdvsa, di 1,3 miyon bpd.
Pdvsa no a logra persuadi su socionan principal den empresanan ‘joint venture’ den Faha di Orinoco, Rosneft di Rusia y CNPC di China, pa acepta participacion minoritario den e refinerianan, a cambio di apoyo financiero y tecnico pa por salba nan.
Un proyecto pa actualisa e refineria di Puerto La Cruz, lansa mas di 10 aña pasa, ta stanca pasobra Pdvsa no a paga e contratista Koreano/Chines Hyundai-Wison, segun e documentacion. Ademas e prijs pa e remodelacion a subi di 4 biyon dollar na 2008 te na 9 biyon dollar actualmente. Tin duda grandi den e anuncio di Pdvsa cu e obra lo keda cla pa fin di 2020.
Tur refineria di Pdvsa ta sufri di un falta di materia prima, servicionan tecnico instabil, huida di empleado cu experiencia y fayonan cronico di ekipo cu Pdvsa no por a drecha pa falta di piesa. E informenan di e compania ta indica cu gran parti di e ekiponan aki no tin reparacion.
E ekiponan ‘socialista’ di emergencia di Pdvsa ta trahando pa restaura capacidad di refinacion mediante reparacion improvisa di unidadnan clave manera e unidadnan di destilacion di Amuay y su ‘fluidized catalytic cracker (FCC). Cuatro di e cinco unidadnan di destilacion ta inactivo, cu un capacidad combina di mas di 500.000 bpd, ademas di varios otro elemento di e planta.
