Parlamento Europeo (PE) a aproba ayera un resolucion den cual ta reconoce Juan Guaido como presidente interino di Venezuela y ta condena e ‘intento di golpi di Estado’ di dia 5 di januari, unda a impedi Guaido presidi un sesion di Asamblea Nacional.
Den un resolucion apoya pa 471 diputado, rechasa pa 101 y cu 103 abstencion, Parlamento Europeo ‘ta reconoce y apoya Juan Guaido como legitimo presidente di Asamblea Nacional y legitimo presidente di Republica Bolivariano Venezuela’.
Ademas, ta condena fuertemente ‘e intento di golpi di estado di Maduro y su aliadonan’, como tambe nan esfuerso pa impedi cu Asamblea Nacional ‘por eherce corectamente e mandato constitucional cu pueblo Venezolano a duna’.
Parlamento Europeo ta rechasa den su resolucion ‘e violacionnan contra funcionamento democratico, constitucional y transparente di Asamblea Nacional’, y ta denuncia igualmente ‘e actonan continuo di intimidacion, soborno, extorsion, violencia, tortura y desaparicion forzoso’.
“Union Europeo ta keda prepara pa apoya un proceso genuino pa yega na un solucion pacifico y democratico di e crisis,” segun e texto, cu ta adverti no obstante cu ‘e intentonan anterior di maneha e crisis a traves di negociacion y dialogo, no a genera resultado tangible’.
Den e texto ‘ta lamenta e violacionnan grave cu ta incompatible cu e proceso legitimo di eleccion di presidente di Asamblea Nacional’ y ta ‘un paso mas den e crisis na Venezuela cu ta sigui empeora’.
E Parlamento ta urgi e alto representante di Union Europeo pa Politica Exterior, Josep Borrell, pa aumenta e respuesta Europeo na e crisis a traves di amplia sancion contra e responsablenan di e violacion di derecho humano y di represion.
