Un tribunal cu competencia den caso relaciona cu terorismo a ordena privacion di libertad di prome vice-presidente di parlamento, Edgar Zambrano, cu lo ser huzga pa husticia ordinario, y a stipula como centro di detencion e sede policial di Fuerte Tiuna, e principal fuerte militar di Venezuela.
Den un comunicado emiti pa Tribunal Supremo diHusticia (TSJ) ta relata cu un tribunal ordinario a dicta e detencion preventivo di Zambrano “pa comision flagrante di e delitonan di traicion di patria, conspiracion, rebelion civil, usurpacion di funcion, instigacion publico pa desobediencia di ley y odio continuamente.”
Tambe a ordena e privacion di libertad pa e ciudadanonan Rosario Pedro, Abrahan Rodriguez, Martin Hernandez y Martin Peña, kendenan tabata acompaña Zambrano na mometo di su detencion.
Zambrano ta ser acusa hunto cu nuebe otro diputado di ta involucra den e rebelion militar di 30 di april.
E familiar y defensornan di Zambrano a señala ayera mainta cu nan ta sigui sin tin informacion di su paradero.
Mientras tanto, tres di e diputadonan acusa hunto cu Zambrano a busca refugio den embahada di otro pais na Caracas. Amerigo de Grazia a logra haya refugio na embahada di Italia, mientras cu parlamentario Mariela Magallanes tambe ta den e mesun embahada, y Richard Blanco ta den embahada di Argentina desde diahuebs pasa.
Juan Guaido, presidente interino di Venezuela, ta continua su lucha convocando otro manifestacion grandi pa awe, diasabra 11 di mei, na Las Mercedes, municipio Baruta.
Via su cuenta di Twitter, Guaido a invita tur ciudadano, bisando “Nos tin apoyo di henter mundo, e dictadura ta den su pio momento, yen di desconfiansa, traicion y conspiracion. Y esey danki na pueblo riba caya!
