Venezuela a sigui paralisa ayera tambe, afectando su economia den crisis caba, y desesperando e poblacion, sin solucion na vista.
E pais petrolero di 30 miyon habitante a keda den scuridad atrobe desde dialuna atardi, poco dia despues di e blackout grandi cu a laga e pais como 100 ora sin electricidad.
E falta di coriente a para suministro di awa, transporte di metro, rednan di telefon y internet, y servicio electronico di banco, vital pa e falta di cash, causa pa e hiperinflacion galopante.
Ademas di capital Caracas, e blackout ta afecta 21 di e 23 estadonan, segun reporte di usuarionanriba rednan social. Gobierno no sa duna informes tocante e impacto di e tipo di emergencia aki.
E apagon a converti den e frente di bataya nobo entre gobierno de facto di Nicolas Maduro y oposicion, lidera pa e hefe parlamentario Juan Guaido. Maduro ta bisa cu ta trata di un “atake terorista” di oposicion apoya pa Estadonan Uni. Guaido ta argumenta cu e no ta nada mas cu e ultimo prueba di ineficacia y corupcion di gobierno Chavista.
Guaido ta prepara un mobilisacion nacional pa palacio presidencial Miraflores pa asumi control, riba fecha pa defini ainda, y no ta descarta pidi Aasmblea Nacional utorisa un intervencion militar di exterior.
Washington tampoco ta exclui un accion militar pa sca Maduro di poder, cu nan ta purba strangula economicamente cu sancion, entre otro un embargo petrolero cu ta bira efectivo dia 28 di april. Sin embargo, ya caba e importacion di crudo Venezolano a bay di mas di 500.000 bari pa dia te cero Recientemente.
