(LaPatilla) – Fausto Romeo Monte, presidente di e Asociacion Nacional de Institutos Educativos Privados (Andiep), a sostene cu cuminsando for di september, 4.500 scol priva na Venezuela ta bay presenta un aumento di entre 60% y 80% den e pago escolar mensual.
Den un entrevista el a splica cu e ahuste ta debi fundamentalmente na dos factor: 70% na repercusion laboral y e resto na aspectonan operacional.
“Locual mas a afecta e cifranan aki ta e impuestonan municipal y e tarifanan di servicionan publico cu a aumenta mas di 500% segun e municipio”, el a argumenta.
El a indica cu e scolnan tin dos aña haciendo ahustenan chikito segun e aumentonan di salarionan.
Sinembargo, el a señala cu anteriormente e gastonan operacional no tabata representa un gran inversion manera cu nan ta representa actualmente.
E dirigente gremial di educacion priva a agrega cu nan kier mehora e salario di e personal di docente, administracion y obrero mirando e aumento di e canasta basico familiar.
“Aworaki lo mester paga minimo $200 y den algun caso hasta $800, incluyendo bonus y otro beneficionan”, el a indica.
E presidente di Andiep a lamenta cu algun scol na hopi parti di e pais ta cerando nan portanan pa motibo cu nan no por mantene nan mes.
El a recorda cu na Venezuela ta existi 4.500 institucionnan educativo priva, di cual, aproximadamente 500 ta wordo subsidia pa Estado Venezolano.
