Ivan Freites, secretario general di e sindicato di trahado petrolero di estado Falcon, a indica diadomingo pasa cu den e contracto colectivo nobo di e trahadonan di Pdvsa cu a firma diaranson pasa, ta impone warda di 12 ora y ta elimina e comedornan di e empresa pa e empleadonan.
Freites a indica cu e eliminacion di e wardanan actual di 8 ora ta implica bolbe na e tempo di siglo XIX. “Nos tin warda di 12 ora so, loke ta bay haci den e zonanan unda e trahadonan mester keda drumi den e instalacionnan pa motibo di e distancia grandi entre nan hogar y e luga di trabao. Sin embargo, no ta aplica esaki den e refinerianan y e zonanan operacional,” el a declara.
E sindicalista a splica cu e comedornan tabata un conkista di e welga petrolero di 1936 riba e companianan transnacional, y a sigura cu awor e empresa ta paga e cuminda na e trahadonan pa no mester abastece e luganan ey cu cuminda debi na e falta di alimento. “E trahadonan petrolero tabata emblema di beneficio laboral riba e continente. Esaki ta demostra solamente cu no ta existi estado di derecho na Venezuela”, el a indica.
Freites a sigura cu e trahadonan petrolero lo tuma accion como rechaso di e contracto colectivo nobo. “Nos mester reconkista e derechonan di e trahadonan y nos libertad.”
Aumento di 180% pa trahadonan
Freites a informa cu e trahadonan petrolero a haya un aumento di 180%. Sinembargo, e ticket di alimentacion no a keda aumenta via contracto colectivo, sino segun e ahust’e di e unidad tributario cu presidente Nicolas Maduro a anuncia.
