(ElNacional) – Varios opositor di Venezuela a señala, cu motibo di e Dia Internacional di Migrante, e gobierno di Nicolas Maduro como responsabel di e crisis migratorio cu e nacion a registra durante ultimo añanan, cu a hiba mas di 7 miyon di Venezolano na bandona nan pais.
Ex-diputado Juan Guaido a sigura ariba Twitter cu e migrantenan ta huy di hamber y pa falta di oportunidadnan cu e dictadura a genera, den referencia na administracion di presidente Maduro.
El a indica cu 75% di Venezolanonan cu a bandona Venezuela, a sali pa falta di empleo y precariedad social, pa ofrece nan famianan algun tipo di apoyo.
Por lo menos 7.1 miyon di Venezolano a sali di nan pais di origen den ltimo añanan, asina Plataforma di Coordinacion Interagencial pa Refugiado- y Migrantenan di Venezuela (R4V), un mecanismo co-lidera pa Agencia di ONU pa Refugiadonan (Acnur) y Organisacion Internacional pa e Migracionnan, a indica den luna di september.
Ex-alcalde David Smolansky, coincidiendo cu Guaido, a afirma cu e dictadura a causa e crisis mirgatorio mas grandi di e planeta.
“Ningun Venezolano mester sinti malo di a crusa e selva Darien of tuma un boto piscado pa scapa e tirania”, el a bisa tambe ariba Twitter.
Di su banda e opositor Miguel Pizarro a argumenta: “Miyones di persona a laga nan hogarnan, a crusa fronteranan y a enfrenta diferente desafionan pa motibo di e conflictonan economico, social y politico causa na nan pais pa e regimen.”
Partido Voluntad Popular (VP), lidera pa Leopoldo Lopez for di Spaña a gradici e paisnan cu a ricibi e Venezolanonan brindando nan oportunidadnan cu e regimen a kita for di nan.
