E politico opositor Enrique Aristeguieta, di 84 aña di edad, a haya su libertad incondicional diasabra marduga, 24 ora despues di su detencion na su cas pa agentenan di servicio di inteligencia di Venezuela (Sebin), asina e organisacion no gubernamental Foro Penal a informa.
“Su abogadonan a informa cu despues di e presentacion dilanti tribunal, a concede Aristeguieta libertad pleno”, e director di e la organisacion, Gonzalo Himiob, a skirbi riba su cuenta di Twitter.
E diputado Delsa Solórzano, presidente di e comision di politica interior di parlamento di mayoria opositor, tambe a confirma libertad completo pa e dirigente di edad halto. E opositor a keda deteni na su cas diabierna marduga, pero autoridadnan no a duna e motibo di e medida aki.
Secretario general di Organisacion di Estadonan Americano (OEA), Luis Almagro, a exigi su libertad, señalando riba Twitter cu su captura es ‘un muestra mas di e arbitrariedad di e dictadura’ di presidente Nicolás Maduro.
Foro Penal ta sigura cu na Venezuela tin como 230 ‘preso politico’, pero gobierno ta nenga esey bisando cu ta trata di persona cu a viola ley. Aristeguieta, cu tabata tambe diputado, gobernador y embahador, ta un di e representantenan di e linea mas radical di oposicion.
