(ElNacional) – Plataforma Unitaria di Venezuela a denuncia diasabra e tiki boluntad cu, nan ta considera, e gobierno ta mustra pa defende e derechonan humano. Esaki, despues cu varios ONG a difundi diferente testimonio di victimanan dilanti Corte Penal Internacional (CPI). E instancia ta realisando un investigacion ariba presunto crimennan di lesa humanidad na e pais.
“E Plataforma Unitaria ta respalda e lucha di victimanan di crimennan di lesa humanidad na Venezuela, esnan cu for di nan fortalesa y balentia a duna nan testimonio dilanti e CPI pa continua cu e investigacion na e pais,” e coalicion a señala a traves di Twitter.
Segun e oposicion, e rapport nobo di CPI ta recoge declaracionnan di 8.900 victima di tratonan cruel y tortura na e nacion. E ta considera cu esaki ta laga den evidencia un biaha mas e violacion di e derechonan humano di e Venezolanonan.
“E revelacionnan nobo ta detaya asesinatonan, persecucion, detencionnan forsa, violencia sexual, ehecucionnan extrahudicial y otro hechonan inaceptable. Ademas e rapport ta resalta e poco boluntad di e regimen pa atende tur cos menciona,” e oposicion a sigui indica ariba e mesun red social.
Durante e ultimo cinco aña, e Organisacion di Nacionnan Uni a denuncia e violacionnan di derechonan humano na Venezuela, un situacion cu a demostra algun mehoracion. Sinembargo den luna di januari ultimo, despues di un bishita breve na e pais, e Alto Comisionado di ONU pa derechonan humano, Volker Turk, a pidi autoridadnan Venezolano pone fin na e tortura.
Dia 1 di november di aña pasa, e fiscal di CPI, Karim Khan a anuncia cu el a pidi e tribunal pa sigui pa dilanti cu e investigacion ariba Venezuela, despues di considera cu e plaso solicita pa e ehecutivo di Nicolas Maduro no ta hustificable.
