(ElNacional) – Oposicion Venezolano lidera pa Juan Guaido ta acusa gobierno di Nicolas Maduro di e atake cu e dirigente politico a sufri diasabra durante su bishita na estado Cojedes. Nan a sigura cu e incidente a pone den riesgo su bida y a inclui tironan contra e auto den cual e lider opositor tabata biaha.
“E atake aki cu a wordo ordena for di Miraflores no solamente a pone den riesgo e bida y integridad fisico di e presidente Guaido y su ekipo di colaboradornan, si no cu e ta un atake contra full e dirigencia politico democratico na Venezuela”, e grupo opositor a denuncia den un comunicado.
E nota ta detaya cu ademas di Guaido, durante e incidente, varios miembro di e ekipo a ricibi golpinan y cu e vehiculo den cual e dirigente tabata biaha a ricibi varios impacto di bala.
Diasabra Guaido a ricibi pushamento y insultonan di parti di un grupo di personanan cu a intercepta su bishita na e localidad di San Carlos na estado Cojedes y cu nan ta supuestamente cercano na oficialismo, e ekipo di prensa antichavista a informa EFE.
E agresion, e antichavismo a sigura, a bini di siguidornan di gobierno, varios di nan arma, mientras cu algun video cu ta circula ariba rednan social ta mustra con varios ciudadano ta insulta, pusha y tira obhetonan contra e dirigente cu tabata den un establecimento.
Oposicion a marca loke a pasa manera un atake violento y cobarde. Nan a responsabilisa militantenan di e Partido Socialista Unido de Venezuela (PSUV) y colectivonan arma, e comunicado ta agrega.
Den oranan di anochi Guaido a papia brevemente, den un declaracion cu a wordo transmiti a traves di rednan social, pa informa cu e no a sufri heridanan grave y cu e tababa back na Caracas.
Despues di e hecho, e subsecretario di e Departamento di Estado di Merca pa Latino America, Brian Nichols, a manifesta su preocupacion pa e hecho. El a marca esaki manera un atake espantoso den cual a pone e bida di diferente persona den riesgo.
