(ElNacional) – E oposicion democratico di Venezuela a ratifica diahuebs cu nan ta bay proteha e identidad di e votadornan cu participa den e eleccion primario cu lo tuma luga dia 22 di october, despues cu e Consejo Nacional Electoral (CNE) a considera e peticion di elimina e sistema di fingerprint den e proceso aki irealisabel.
“Den ningun caso e identidad di e votadornan ta bay ta den riesgo. Semper nos a sostene cu nunca nos lo acepta ningun schedule di primaria den cual lo pone den riesgo e identidad di e votadornan,” e presidente di e Comision Nacional de Primarias, Jesus Maria Casal, a señala den un rueda di prensa.
E declaracion ta bin dos dia despues cu e CNE a considera irealisabel e peticion di e oposicion pa elimina e sistema di fingerprint di e proceso electoral. El a hustifica cu esaki ta genera un vulnerabilidad y ta habri un buraco pa e violacion di e proceso di un votador, un voto.
Casal a indica cu den e escneraionan cu nan a propone na CNE, pa duna apoyo na e eleccion primario den luna di october, ta plantia e eliminacion di cualkier mecanismo biometrico pa capta e identidad di e votador, esta e sistema di fingerprint, manera un mecanismo di proteccion pa esnan cu ta participa.
Casal a señala cu e obhetivo pa realisa sesionnan special di inscripcion y actualisacion di e registro electoral ta pa tur e Venezolanonan cu tin mester di dje por participa den e proceso aki.
“Nos mester aclaria cu nos solicitud pa sesionnan di actualisacion y inscripcion di e registro electoral ta referi na tur e Venezolanonan, na ningun momento e tabata referi of ta referi solamente na e interesnan cu un factor politico por señala,” el a agrega.
