E Coalicion Ayuda y Libertad Venezuela, crea pa Juan Guaido pa responde na e necesidadnan di poblacion Venezolano, a declara diamars pasa na Miami cu den ultimo tres luna nan a logra cu mas di 800 tonelada di ayudo humanitario a drenta e pais, a pesar di e “intentonan di e dictadura pa blokea nan entrada.”
Den e rueda di prensa na Miami pa informa di e resultado di e prome 100 dia di trabao, Lester Toledo, coordinador internacional di ayudo, a mustra riba e avancenan haci den preparacion di un “plan di emergencia” pa e momento cu e “usurpacion di poder” di Nicolas Maduro yega na su fin.
“A establece aliansa cu e empresanan mas grandi di mundo specialisa den logistica, pa preparacion di e plan di emergencia,” Toledo a declara.
Segun Toledo, danki na apoyo di mas di 60 nacion, 57 organisacion no gubernamental, Iglesia catolico, diputadonan di Asamblea Nacional, funcionario y militarnan a logra entrega te na e momento ey “814.000 kilo di ayudo humanitario na Venezuela.”
E ayudo, e contenido di 24 container completo, ta consisti di alimento cu por conserva, medicamento, ekipo medico y otro material. Coalicion Ayuda y Libertad Venezuela a crea un cadena humano di distribucion di ayudo pa evita cu e por cay den man di gobierno, o ser mal usa.
Algun sindicato di salud, manera e Colegio di Enfermera, a calcula e falta di material medico y medicamento na 80 %. Segun cifra di Organisacion di Nacionnan Uni (ONU), siete miyon persona mester di ayudo humanitario na Venezuela.
