(AP) — Oficialnan senior di gobierno Mericano di forma keto a biaha na Caracas den e intento mas recien pa trece cas e Mericanonan detenido, y reconstrui relacionnan cu e gigante petrolero di Sur America, mientras e guera na Ucrania ta continua, forsando Merca pa recalibra otro obhetivonan di politica internacional.
Un vocero di Departamento di Estado Mericano a describi e trip como un bishita di bienestar enfoca riba seguridad di varios ciudadano Mericano deteni na Caracas, incluyendo un grupo di ehecutivonan petrolero for di Citgo, basa na Houston, cera mas di cuatro aña pasa. E delegacion ta inclui Roger Carstens, e enviado special presidencial pa asuntonan di rehen, como tambe embahador James Story, kende ta lidera e Unidad di Asunto Venezolano di gobierno Mericano for di bisiña Colombia.
Presidente Nicolas Maduro a confirma e bishita durante comentarionan riba television, bisando cu e delegacion lo reuni cu un aliado confiable, presidente di Asamblea Nacional, Jorge Rodriguez, pa ‘duna continuidad na e agenda bilateral entre gobierno di Merca y gobierno di Venezuela’.
E bishita ta sigui un biahe sorpresa na maart di e dos oficial y Juan Gonzalez, e director di Conseho di Seguridad Nacional pa Hemisferio Occidental. Esey tabata e prome biahe di Cas Blanco na e pais den mas di dos decada.
E biahe ey a resulta den liberacion di dos ciudadano Mericano kende Merca a considera como deteni inhustamente, y un promesa di Maduro pa inicia negociacion cu su oponentenan. Lunanan prome, el a suspende e negociacionnan, dirigi pa diplomaticonan Noruego na Mexico, despues di extradicion di un aliado clave na Merca pa cargonan di labamento di placa.
No ta cla kico otro e oficialnan ta buscando pa logra durante e mision. Pero riba e lista probablemente tin e exigencia di Maduro pa Merca elimina sancionnan debilitante riba petroleo, cu a exacerba dificultad den loke antes tabata e nacion mas prospero di Sur America.
Na yegada na Caracas, Story a reuni pa dos ora cu Juan Guaido, segun un persona cercano na e lider di e oposicion cu sosten Mericano. E dos a discuti esfuersonan pa reauda negociacionnan na Mexico, segun un fuente.
Desde e biahe na maart, tanto administracion di Biden como gobierno socialista di Venezuela a mustra un disponibilidad pa acerca otro despues di añanan di hostilidad entre Washington y Caracas pa motibo di reeleccion di Maduro na 2018, cual tabata mancha pa iregularidad. Merca y otro nacionnan a retira reconocemento di Maduro despues di e eleccion, y na su lugar, a reconoce Guaido como lider legitimo di Venezuela.
Maske negociacionnan entre Maduro y oposicion ainda mester reanuda, Merca a renoba un licencia pa asina companianan petrolero, incluyendo Chevron, por continua cu mantencion basico di wells cu nan ta opera conhuntamente cu gigante petrolero estatal, Pdvsa.
Cas Blanco tambe a elimina sancionnan imponi na 2017 riba sobrino di prome dama Cilia Flores, kende e tempo aya tabata cusa di facilita corupcion mientras e tabata oficial top na Pdvsa.
E biahe ta yega despues di un suplica publico na administracion di Biden for di Matthew Heath, un ex-marinier Mericano aresta casi dos aña pasa riba loke Merca ta considera cargonan inventa di terorismo. Famia di Heath e luna aki a haci un yamado riba e administracion pa tuma accion urgente pa scapa su bida despues di loke nan a bisa tabata un intento di suicidio, cual AP no a logra verifica.
Merca tambe ta interesa pa hinca man den e rikesa amplio di petroleo Venezolano mientras e guera na Ucrania a conduci na un aumento di 50 porciento den prijs di petroleo, cu ta impulsando e pio inflacion den varios decada.
Maduro durante su comentarionan riba television dialuna a aludi na comentarionan di un oficial cercano na presidente Frances, Emmanuel Macron urgiento Merca pa alivia sancionnan riba Venezuela y Iran pa compensa e aumento den prijs di petroleo.
A haci e comentarionan na banda di e reunion di lidernan di Grupo di Siete na Alemania.
Venezuela tin e reservanan proba di petroleo mas grandi na mundo, pero produccion a cay durante ultimo decada como resultado di caida den prijs, mal maneho, y sancionnan Mericano. Su presencia den mercado mundial awendia ta marginal, y cualkier intento pa reforsa produccion lo tuma su tempo pa materialisa.
