Gustavo Tarre Briceño, Embahador Interino di Presidente encarga di Venezuela, Juan Guaido na Organisacion di Estadonan Americano (OEA), a revela cu e organismo lo vota diaranson dia 18 di september riba e activacion di e Tratado Interamericano di Asistencia Reciproco (TIAR) pa e caso di Venezuela.
“Nos lo propone activacion di e Tratado Interamericano di Asistencia Reciproco a traves di e peticion di Venezuela y e mayoria cu ta apoya,“ Tarre Briceño a bisa mediante un rueda di prensa na Washington, Estadonan Uni.
“E tratado ta contempla ruptura di relacion comercial, radiofonico y diplomatico. Ta contempla finalmente e opcionnan di caracter internacional,“ el a manifesta y a agrega cu “gobierno encarga ta elaborando un informe den cual ta resalta e peligro cu permanencia di e usurpacion (di e regimen di Nicolas Maduro) ta significa pa e region.”
“Maduro ta comete un violacion di derecho internacional amparando gruponan guerrillero dentro di Venezuela,“ el a bisa finalisando.
Mientras tanto, na Venezuela mes gremionan sindical a urgi comunidad internacional pa pasa pa creacion di un comision pa investiga violacion di Derecho Humano na Venezuela.
Nan ta sigura cu na e pais aki “no ta existi institucionalidad democratico pa investiga y sanciona e violacionnan grave di derecho humano,” como tambe cu, despues di e bishita di e Alto Comisionado di Derecho Humano di Nacionnan Uni, Michelle Bachelet, “a keda demostra cu Nicolas Maduro no tin boluntad politico pa cumpli cu su palabra den e compromisonan firma.”
